പുളിമാത്ത്
ഗ്രാമ പഞ്ചായത്ത്

പുളിമാത്ത് ഒരു ഗ്രാമപഞ്ചായത്താണ്. ഇത് കേരള തലസ്ഥാനമായ തിരുവനന്തപുരത്തു നിന്ന് ഏകദേശം 34 കിലോമീറ്റര്‍ വടക്കുമാറി സ്ഥിതിചെയ്യുന്നു. വാമനപുരം നദിയുടെയും കിളിമാനൂര്‍ ചിറ്റാര്‍ നദിയുടെയും സമതലങ്ങളിലാണ് ഈ പ്രദേശം രൂപംകൊണ്ടത്. പുരാതന ചരിത്ര പശ്ചാത്തലമുള്ള പുളിമാത്ത്, സ്വാതന്ത്ര്യസമരത്തിന് ദേശസ്നേഹികളെ സംഭാവന ചെയ്ത നാടാണ്. കേരളത്തിന്‍റെ മറ്റ് ഭാഗങ്ങളിലെപ്പോലെ ഇവിടെയും നാടുവാഴി ഭൂപ്രഭുക്കന്മാരുടെ നിയന്ത്രണവും ജാതിവ്യവസ്ഥയിലധിഷ്ഠിതമായ ഭരണസംവിധാനവും നിലനിന്നിരുന്നു, എങ്കിലും പിന്നീട് നിയമപരവും സാമൂഹികപരവുമായ മാറ്റങ്ങളിലൂടെ വലിയ പരിവര്‍ത്തനമുണ്ടായി. പുളിമാത്ത് പ്രദേശത്തിന്‍റെ പേരിനു പിന്നിൽ രണ്ട് അഭിപ്രായങ്ങളുണ്ട്: ഒന്ന് - കാട്ടുപുലികളുടെ ശല്യത്തിൽ നിന്ന് രക്ഷിക്കാൻ പ്രത്യക്ഷപ്പെട്ട പുലിപ്പുറത്തുകയറിയ മാതാവ് എന്ന സങ്കൽപ്പത്തിൽ നിന്ന് പുലിമാതാവ് എന്ന പേര് പുളിമാത്ത് ആയതെന്നാണ്. മറ്റൊന്ന് - കൊടുംകാടായിരുന്ന കാലത്ത് ധാരാളം പുളിമരങ്ങൾ ഉണ്ടായിരുന്നതിനാൽ ആ പേര് ലഭിച്ചു എന്നതാണ്. പുളിമാത്ത്, കൊടുവഴന്നൂര്‍ എന്നീ വില്ലേജുകളിലായി വ്യാപിച്ചുകിടക്കുന്ന പഞ്ചായത്തിന് 26.96 ചതുരശ്ര കിലോ മീറ്റര്‍ ഭൂവിസ്തൃതിയുണ്ട്. 2001 ലെ സെന്‍സസ് പ്രകാരം ഇവിടുത്തെ ജനസംഖ്യ 31,219 ആണ്. വടക്ക് കിളിമാനൂര്‍, പഴയകുന്നുമ്മേല്‍, കടക്കല്‍, കുമ്മിള്‍ ഗ്രാമപഞ്ചായത്തുകളും കിഴക്ക് കല്ലറ, വാമനപുരം ഗ്രാമപഞ്ചായത്തുകളും തെക്ക് വാമനപുരം നദിയും പടിഞ്ഞാറ് നഗരൂര്‍ ഗ്രാമപഞ്ചായത്തുമാണ് നിലവിലെ അതിരുകൾ.

തിരുവിതാംകൂര്‍ പ്രദേശത്ത് ജനാധിപത്യരീതിയില്‍ നടന്ന ആദ്യത്തെ പഞ്ചായത്ത് തെരഞ്ഞെടുപ്പിലൂടെ 1953 ൽ നിലവില്‍ വന്ന ആദ്യ ഭരണസമിതിയുടെ അദ്ധ്യക്ഷന്‍ ശ്രീ കെ ശങ്കരനാരായണന്‍ പോറ്റി ആയിരുന്നു. ശ്രീമതി ഭാനുമതി പഞ്ചായത്തിലെ ആദ്യത്തെ വനിതാ പ്രസിഡന്റായി തെരഞ്ഞെടുക്കപ്പെട്ടു. 1994 ലെ കേരള പഞ്ചായത്ത് രാജ് ആക്റ്റ് പ്രകാരമുള്ള ആദ്യത്തെ പഞ്ചായത്ത് ഭരണസമിതി നിലവില്‍ വന്നത് അതിനുശേഷമാണ്. നിലവില്‍ 19 വാര്‍ഡുകള്‍ പഞ്ചായത്തിലുണ്ട്. വാമനപുരം നദിയുടെ ജലവിതാനത്തിനനുസരിച്ച് ഇവിടെ വെള്ളപ്പൊക്കവും വരള്‍ച്ചയും ഉണ്ടാകാറുണ്ട്. പൊന്‍മുടി കുന്നുകളിലെ ഉരുള്‍പൊട്ടലും മലവെള്ളവും വാമനപുരം നദിയെ ബാധിക്കാറുണ്ടെങ്കിലും മനുഷ്യജീവന്‍ അപകടത്തിലാക്കുന്ന പ്രളയം ഉണ്ടാകാറില്ല. എങ്കിലും, 2018, 2019 വർഷങ്ങളിലെ സംസ്ഥാന വ്യാപക പ്രളയം ഇവിടെ വീടുകൾക്കും വസ്തുവകകൾക്കും നാശനഷ്ടങ്ങൾ ഉണ്ടാക്കി.